वाढतं प्रदूषण आणि ग्लोबल वॉर्मिंग आज संपूर्ण जगासमोर मोठं आव्हान बनून उभं ठाकलं आहे. त्यातच आता ग्रीन बिजनेस नव्या उद्योगांसाठी उत्पन्नाचा एक आश्वासक पर्याय म्हणून उदयास आला आहे.
सरकारही पर्यावरणपूरक व्यवसाय सुरू करण्यासाठी सबसिडी देत आहे, तसंच बँकाही यासाठी स्वस्त आणि सोपं ग्रीन लोनही देत आहेत. ग्रीन बिजनेस सुरू करण्यासाठी तुमच्याकडे वेगवेगळे पर्याय उपलब्ध आहेत.
सोलार एनर्जी बिजनेस
वाढतं वीज बिल आणि प्रदूषणाचा सामना करण्यासाठी सरकार सोलार सेक्टरवर मोठ्या प्रमाणावर लक्ष केंद्रित करत आहे. ग्रीन बिजनेस सुरू करायचा असेल तर तुम्ही सोलार पॅनल डीलरशिप, सोलार प्रॉडक्ट्स मॅन्युफॅक्टरिंग किंवा सोलार पॅनल इन्स्टॉलेशन हे स्टार्टअप सुरू करू शकता.
सरकारची पीएम सूर्य घर मोफत वीज योजना आणि इतर रूफटॉप सोलार योजना व्यावसायिक आणि घरात सोलार प्लँट लावण्यसाठी भरपूर सबसिडी देतात. यातून छोट्या उद्योगांना 30 ते 40 टक्के सबसिडी मिळते.
रिसायकलिंग ऍण्ड वेस्ट मॅनेजमेंट
प्लास्टिक, ई-कचरा आणि सॉलिड वेस्ट रिसायकल करणं हा आजच्या काळातला सर्वाधिक वाढणारा बिजनेस आहे. तुम्ही जुन्या प्लास्टिक बाटल्यांपासून कपडे बनवण्याचा, जुन्या इलेक्ट्रॉनिक वस्तूंमधून मौल्यवान धातू काढण्याचा किंवा ओल्या कचऱ्यापासून सेंद्रिय खत तयार करण्याचा कारखाना उभारू शकता.
स्वच्छ भारत मिशन आणि स्टार्टअप इंडिया अंतर्गत, सरकार कचरा व्यवस्थापन प्रकल्पांसाठी जमीन वाटप आणि यंत्रसामग्री खरेदीसाठी विशेष ग्रांट आणि सबसिडी देते.
EV चार्जिंग स्टेशन्स आणि ई-कचरा-मुक्त पॅकेजिंग
देशात इलेक्ट्रिक वाहनांची संख्या वाढत असल्याने, ईव्ही चार्जिंग स्टेशन्सची मागणीही वाढत आहे. शिवाय, प्लास्टिक पॅकेजिंगवरील बंदीनंतर, बायोडिग्रेडेबल आणि कागदी पॅकेजिंगचा व्यवसायही तेजीत आहे.
‘ग्रीन लोन’ योजना आणि कमी व्याजदर
ग्रीन लोन म्हणजे पर्यावरणपूरक प्रकल्प आणि व्यवसायांसाठी दिले जाणारे कर्ज. सरकार आणि प्रमुख बँका ‘ग्रीन फायनान्सिंग’ अंतर्गत खूप स्वस्त कर्ज देत आहेत. सिडबी (SIDBI) सारख्या सरकारी संस्था आणि एसबीआय (SBI) आणि पीएनबी (PNB) सारख्या बँका ग्रीन प्रकल्पांसाठी नियमित व्यावसायिक कर्जापेक्षा 1% ते 2% कमी व्याजदराने कर्ज देतात. सूक्ष्म आणि लघु उद्योगांसाठी क्रेडिट गॅरंटी फंड ट्रस्ट (CGTMSE) अंतर्गत, अनेक ग्रीन स्टार्टअप्सना तारणाशिवाय कर्ज मिळते. तुमचा व्यवसाय स्थिर होईपर्यंत ईएमआयचा बोजा टाळण्यासाठी बँका परतफेडीसाठी अतिरिक्त वेळ (मॉरेटोरियम पीरियड) देखील देतात.