महागाईच्या काळात नवीन कार खरेदी करण्याचा विचार करणाऱ्या ग्राहकांसाठी मोठी आनंदाची बातमी समोर आली आहे. देशातील सर्वात मोठी कार उत्पादक कंपनी मारुती सुझुकीने ग्राहकांना वाढत्या किमतींपासून दिलासा देण्यासाठी विशेष ‘प्राइस प्रोटेक्शन स्कीम’ जाहीर केली आहे.
या योजनेअंतर्गत ग्राहकांना ठराविक कालावधीत कार बुक केल्यास वाढीव किमतीऐवजी जुन्याच दरात वाहन खरेदी करण्याची संधी मिळणार आहे.
काही दिवसांपूर्वी उत्पादन खर्चात वाढ झाल्याचे कारण देत कंपनीने आपल्या काही मॉडेल्सच्या किमतीत 30 हजार रुपयांपर्यंत वाढ करण्याचा निर्णय जाहीर केला होता. मात्र आता ग्राहकांना अचानक वाढलेल्या किमतींचा फटका बसू नये म्हणून कंपनीने नवीन सवलतीची योजना आणली आहे.
14 जूनपर्यंत बुकिंग केल्यास मिळणार फायदा
मारुती सुझुकीच्या नव्या योजनेनुसार, 14 जून 2026 पर्यंत पात्र वाहनांचे बुकिंग करणाऱ्या ग्राहकांना जुन्या किमतींचा लाभ दिला जाणार आहे. म्हणजेच दरवाढ लागू झाली असली तरी ठराविक कालावधीत बुकिंग करणाऱ्यांना वाढीव किंमत भरावी लागणार नाही. यामुळे कार खरेदीचा निर्णय पुढे ढकलणाऱ्या ग्राहकांसाठी ही योजना मोठा दिलासा ठरू शकते.
कोणत्या गाड्यांवर लागू आहे ऑफर?
कंपनीने स्पष्ट केले आहे की ही ‘प्राइस प्रोटेक्शन स्कीम’ त्यांच्या लोकप्रिय एंट्री-लेव्हल मॉडेल्सवर लागू असेल.
या योजनेचा लाभ खालील चार गाड्यांवर मिळणार आहे:
मारुती अल्टो K10
मारुती एस-प्रेसो
मारुती सेलिरिओ
मारुती वॅगन आर
या गाड्यांपैकी कोणतेही मॉडेल वेळेत बुक केल्यास ग्राहकांचे हजारो रुपये वाचू शकतात.
डीलर्सच्या सूचनेनंतर घेतला निर्णय
मारुती सुझुकीचे वरिष्ठ अधिकारी पार्थो बॅनर्जी यांनी सांगितले की, डीलर नेटवर्ककडून आलेल्या अभिप्रायाच्या आधारे हा निर्णय घेण्यात आला आहे. वाढत्या महागाईच्या पार्श्वभूमीवर मध्यमवर्गीय ग्राहक कार खरेदीपासून दूर जाऊ नयेत, हा या योजनेमागचा मुख्य उद्देश असल्याचे त्यांनी सांगितले.
‘सुहाना सफर’ योजनेचीही मोठी चर्चा
प्राईझ प्रोटेक्शनसोबतच कंपनीने ‘सुहाना सफर’ नावाची एक विशेष फायनान्स योजना सुरू केली आहे. ही योजना रिकरिंग डिपॉझिट (RD) आणि कार लोन यांची सांगड घालते.
या योजनेत ग्राहक संभाव्य ईएमआयइतकी रक्कम दरमहा आरडी खात्यात जमा करतात. या रकमेवर व्याजही मिळते आणि काही महिन्यांनंतर जमा झालेली रक्कम कारच्या डाऊन पेमेंटसाठी वापरता येते. त्यामुळे एकाच वेळी मोठी रक्कम उभारण्याचा ताण कमी होतो.
कंपनीच्या माहितीनुसार, या योजनेला ग्राहकांचा चांगला प्रतिसाद मिळत असून हजारो ग्राहकांनी चौकशी केली आहे आणि अनेकांनी बुकिंगही पूर्ण केले आहे.