निवृत्तीनंतर आर्थिक स्थैर्य मिळावे आणि दरमहा निश्चित उत्पन्न सुरू राहावे, अशी प्रत्येकाची इच्छा असते. अशा परिस्थितीत भारतीय आयुर्विमा महामंडळाची (LIC) ‘सरल पेन्शन योजना’ हा अनेकांसाठी आकर्षक पर्याय ठरू शकतो.
या योजनेत फक्त एकदाच गुंतवणूक करावी लागते आणि त्यानंतर आयुष्यभर निश्चित पेन्शन मिळत राहते.
एकदाच गुंतवणूक, आयुष्यभर पेन्शन
LIC ची सरल पेन्शन योजना ही सिंगल प्रीमियम अॅन्युइटी योजना आहे. म्हणजेच, एकदाच ठराविक रक्कम गुंतवल्यानंतर नियमित पेन्शन मिळण्यास सुरुवात होते. विशेष म्हणजे, सुरुवातीला जी पेन्शन निश्चित केली जाते, तीच रक्कम संपूर्ण आयुष्यभर मिळत राहते. त्यामुळे निवृत्तीनंतर नियमित उत्पन्नाची खात्री मिळू शकते.
पीएफ किंवा ग्रॅच्युइटीची रक्कमही करता येते गुंतवणूक
निवृत्तीनंतर मिळणारा पीएफ किंवा ग्रॅच्युइटीचा निधी या योजनेत गुंतवून त्यावर नियमित पेन्शन मिळवता येते. ही योजना विशेषतः निवृत्तीनंतर मासिक उत्पन्नाचा स्थिर स्रोत शोधणाऱ्या नागरिकांसाठी उपयुक्त मानली जाते.
पती-पत्नी मिळूनही घेऊ शकतात योजना
LIC सरल पेन्शन योजनेसाठी वयोमर्यादा ४० ते ८० वर्षे निश्चित करण्यात आली आहे. या योजनेचा लाभ एकट्या व्यक्तीला घेता येतो किंवा पती-पत्नी संयुक्त स्वरूपातही पॉलिसी घेऊ शकतात. या योजनेत आयुष्यभर निश्चित पेन्शनची सुविधा मिळत राहते.
सरेंडर आणि कर्जाची सुविधाही
या योजनेत पॉलिसीधारकाला काही विशेष सुविधा देखील दिल्या जातात. पॉलिसी सुरू झाल्यानंतर ६ महिन्यांनंतर सरेंडर करण्याची सुविधा मिळते. तसेच, ६ महिन्यांनंतर कर्जही मिळवता येते. पॉलिसीधारकाच्या निधनानंतर नामनिर्देशित व्यक्तीला मूळ गुंतवणुकीची रक्कम परत दिली जाते.
मासिक, तिमाही, सहामाही किंवा वार्षिक पेन्शनचा पर्याय
या योजनेअंतर्गत किमान ₹१२,००० वार्षिक अॅन्युइटी खरेदी करता येते. विशेष म्हणजे कमाल गुंतवणुकीची कोणतीही मर्यादा नाही. मासिक, तिमाही, सहामाही किंवा वार्षिक अशा कोणत्याही स्वरूपात पेन्शन घेण्याचा पर्याय उपलब्ध आहे.
₹४० लाखांच्या गुंतवणुकीवर किती मिळू शकते पेन्शन?
LIC कॅल्क्युलेटरनुसार, ४० वर्षांच्या व्यक्तीने एकरकमी ₹४० लाखांची गुंतवणूक करून अॅन्युइटी खरेदी केल्यास अंदाजे वार्षिक पेन्शन ₹२,६२,४५४, तर मासिक पेन्शन सुमारे ₹२१,८७१ मिळते. मात्र, प्रत्यक्ष मिळणारी पेन्शन गुंतवणुकीची रक्कम, वय आणि त्या वेळी लागू असलेल्या अटींनुसार बदलू शकते.